Bose × iPod 細細哋嘭嘭聲

iPod熱已蔓延至 High-End音響界，就連發燒級來路品牌 Bose，亦要求埋堆！呢位音響界老行尊，今次唔玩大型座地喇叭，亦唔係掛天花嗰種；為求輕鬆入屋，佢推出一款可直插 iPod嘅 SoundDock 10，機身嚴重縮水，仍保留自家擴音技術專利，機身細細，估唔到播歌時炸到嘭嘭聲！

記者：陳國輝
攝影：陳盛臣

爆殼入面似迷宮

唔用 iPod時，可另購藍芽傳送器。

係咪單元尺寸越大，部機就越炸得？理論上似乎係。不過，今次 SoundDock 10想講嘅係即使機身體積輕巧，聲量也可以好爆！先睇三圍數字，原來佢只有 7"高、 17"長同埋 10"闊，驟眼睇相等於一部 Printer咁大，放上茶几啱啱好；但唔怕話你知，放得咁近，小心隨時變聾耳陳！唔係嚇你，首次試聽時，雖然 SoundDock 10被刻意用窗簾遮擋，但播放時嘅音量勁度，令記者以為係兩座大喇叭在發聲，揭開布先知，竟然係一部只得兩單元和擁有獨立低音嘅迷你喇叭組合。

點解咁炸得？今次 Bose特意將 SoundDock 10解體，向大家講解！謎底在於一個睇落極普通嘅塑膠硬殼，拎上手好輕，打側睇仲發現有個迂迴曲折嘅「小迷宮」，呢樣嘢就係 Bose嘅 Waveguide專利技術。據講，概念係來自管道令聲音集中傳送嘅特點，當聲音經管道到達「出口」，聲量會比一般喇叭更好炸，再者，低音炮已被安裝到機身背面，相對同類型音響組合， SoundDock 10絕對好砌！

拆開入面睇，據講每一條管道設計，都經詳細計算。

遙控細細隻，亦可直接操控 Click Wheel。

Woofer位處機背，低頻表現無得頂。

得一組 Video Out及 Aux In，略嫌簡單。

Profile

$5,380

型號： SoundDock 10
端子： Video Out、 Aux、可另配藍芽插座
主要功能： iPod及 iPhone專用插槽、 Waveguide技術、兩個 Bose Twiddler單元及一個低音喇叭

查詢： Bose（ 2123 9000）

手提式無線操作

另一款型號叫 SoundLink，雖不設 iPod Docking，但可以喺電腦身上插一支無線 USB Key，再透過 iTunes或 Pandora音樂程式播放或選曲，即可於 30米範圍內，自由操控！其體積比 SoundDock 10仲要細，主因佢拎得出街，而且支援鋰電池，唔駁電源情況下，連續播放時間長達 8小時！另外，佢亦內置 Waveguide專利技術，聲量同樣炸得，但比起 SoundDock 10，似乎後者勁啲喇！

全黑設計遙控器，操作簡單。

鋰電池隔籬有一組 Audio In。

用銀仔就可拆出鋰電池。

Profile

$4,780

型號： SoundLink
主要功能： Wi-Fi連線、跟機送 USB Key駁電腦、支援鋰電池、 3至 8小時連續播放

蘋果日報