潮館： Wing Shya愛情獵影

Wing Shya最新為港爭光的舉措──將拍攝美國新一代妖姬 Lady GaGa做代言人的 Polaroid廣告照。　
攝影：葉君海

藉着鏡頭說出風格多變、既有浪漫又有刺激也帶實驗的千言萬語，夏永康（ Wing Shya）的作品都令「我們這一代」看得津津有味有 feel有得着。攝影機跟身 17個年頭， Wing最新染指電影，處女作《全城熱戀．熱辣辣》借電影鏡頭說他想要說關於對愛情堅持的故事，「何事都要堅持，包括媾女！我嘗試溝樣新嘢畀大家睇！」
撰文：梁錦貞

電影－初次執導筒

Wing的作品由偏鬆與矇的業餘，掌握到今天的強烈風格。

夏永康最近與好友 Tony Chan首次執起導演筒，將於 2月公映的《全城熱戀．熱辣辣》是由五段短片砌成的現代人愛情故事，他說：「四張幾先第一次做導演算遲，不過如果我早 10年做導演，一定淨係掛住演嘢、掛住要爆。家我同拍檔嘅目的係要拍一套關於『家』嘅嘢，要自然生活化，有人性，要大家睇得明，唔離開群眾，當然我玩咗嘢你都唔覺！」

Wing說：「套戲係圍繞住幾段愛情故事，主題訊息係要堅持，唔好放棄，好簡單，就好似媾女，想掂都係要堅持，我主力負責影像， Tony就主力劇本對白。」

拍戲當甜品

Wing續說：「同影相嚟比，一張相點都係一張相，極其量係誇啲威啲，但係電影方法就好多，有場景、有對白、有音樂，容易帶出 motion，為咗拍出自然生活化，我專登一套偏嘢都唔睇，盡量唔畀呢啲嘢入腦，例如我哋要拍食飯 shot，反而睇好多呢類 reference，好似《奇幻逆緣》（ The Curious Case of Benjamin Button）、《色，戒》咁，原來拍生活化嘅 shot好難，激動嘅大喊大叫跳海就容乜易。」

Wing自言對票房成績沒有壓力，他說：「我當呢部戲係甜品，影相先至係碗飯，唔得嘅都仲有飯開，永遠抱住當佢係最後一部咁拍。」終於做導演，他指最大鼓勵來自張叔平，他說：「阿叔話：『玩啦，試啦，唔使有包袱，想做咪做囉』。」問他跟王家衛合作多時，有否偷到嘢用?他說：「冇嘢用得着！因為佢嘅嘢始終係佢嘅，我幫王家衛影相都係佢隻手嚟 o架咋，啲嘢始終係佢同阿叔嘅。」

Wing Shya首次做導演《全城熱戀．熱辣辣》，他將從影像中，訴說出愛情。

攝影－瀨嘢變風格

張曼玉在夏永康的鏡頭下顯得份外有味道。

Wing Shya身為王家衛御用攝影師，曾為《春光乍洩》及《花樣年華》等電影拍劇照。他先後畢業於李惠利工業學校、白英奇專業學校及加拿大 Emily Carr Institute，主修 Fine Art，大學時最迷就是 Andy Warhol及《 Interview》，從沒輕視商業，只認為自己無法 handle。在商台工作時，一天林海峰（ Jan）跟他說：「我老婆要出碟，你幫佢影封面啦。」拎起相機的第一個機會，是阿 Jan給他的。

喜好勝技術

Wing說：「我仲記得彭羚嗰隻碟叫《 C for Cass》，跟住逐啲逐啲有唔同人叫我影嘢，其實我影親唔係鬆就矇或者 under，直接啲講就係瀨嘢！啲人問點解會咁，梗係死撐話特登同 style啦！有次阿智（蔡一智）畀機會我幫鄭秀文影佢隻碟《十誡》封面，我就想影得好 colorful，走去買啲彩色紙用嚟打燈，點知買錯晒啲聖誕玻璃紙，仲燒爛埋人哋 studio啲燈！直至有次幫《 amoeba》影阿 Jan，真係衰晒，又係 under，之後 Sam Wong打電話畀我『你啲相真係好 un（ under）喎』，對住佢我仲敢撐咩？當然認係唔識嘢瀨嘢啦！點知佢話『我就係鍾意你唔 X識』，吓！ Sam Wong都咁講，就有恃無恐直情用 Fine Art嘅角度同方法去影啦，慢慢真係成為所謂我嘅風格，係感情同喜好多過技術。」

為王家衛拍攝劇照無數， Wing謙稱自己是對方的一隻手而已。

飛佛大師

講到「飛佛」的攝影師， Wing說：「 Andy Warhol唔在講啦，一樣嘢就夠做，你畀個麥當娜（ Madonna）喺佢面前都係影 Polaroid！另外我仲鍾意 Nan Goldin、 Terry Richardson、 Richard Avedon同荒木經惟，佢哋幾個風格都唔一樣，不過都係離不開一種好強烈自己鍾意嘅嘢，慢慢出咗嚟就係自己嘅特色風格，我冇諗過要似佢哋，因為我諗我冇佢哋咁癲同咁大勇氣，最主要都係因為我性格都係怕醜，你睇我嘅作品其實已經去盡咗 o架啦，我唔敢大搖大擺去投入，只係會隔住條門罅去偷窺。」

四大鍾情名師作品

美國女攝影師 Nan Goldin作品充滿震撼力，更創作了名為「視覺日記」的攝影風格。

於 04年逝世的 Richard Avedon，被譽為是最有影響力的攝影大師。

專用儍瓜機拍攝的 Terry Richardson，卻是最潮的情色攝影師，在他主理下，羅賓漢可以與蝙蝠俠親吻。

日本攝影師荒木經惟的鏡頭下永遠的主角：女人，其作品有些更被稱為色情圖片。

後話：

由取得國際級潮書如《 i-D》入場券開始， Wing這些年還有為巴黎《 VOGUE》、日本《 VOGUE》等等操刀，未來 project，他 hyper形容如取得奧運參賽資格，是明年將為意大利《 VOGUE》及熱爆歌姬 Lady GaGa拍攝當 Polaroid代言的廣告照。

蘋果日報 - 20091226