$0出 iPhone 4× iPad任玩　最抵蘋果餐

新 iPhone 4今日登陸香港！唔知醒去蘋果店排頭位搶貨？喺網絡商上台出機囉！今次最大分別，係率先有貨供應網絡商由一間變五間，除例牌$0機價月費，估唔到 3仔再出招送 iPad無限 Data任玩，如果你係蘋果死忠粉絲兼大部份時間都用嚟上網，呢份「蘋果餐」肯定啱你胃口。

記者：陳國輝
攝影：梁細權
Model： Kinki@Pure Models

$398月費送機無新意

呢次提供 iPhone 4月費 Plan嘅網絡商，除咗 3仔，仲有數碼通、 1010、 One2free及 PCCW共 5間！或者你認為，只要四周圍格一格價，咁咪知道邊間出機最平囉！

Sorry！咪天真，如果你想出個$0機價月費，基本上 3仔、數記、 PCCW同樣要選$398或以上月費，並簽約 24個月，再者，三家都要先付$4,480（ 16GB）及$5,280（ 32GB）作預繳，即係話任可一間都唔會特別着數。

但講到舊客仔，似乎 3仔比較 So啲！皆因用緊$498月費嘅舊客，若選擇再續約兩年，佢除咗唔使畀$580出部 32GB版 iPhone 4，仲可以免費開多張 Micro SIM（合共兩張），享用無限 Data，變相一個月費任玩 iPhone及 iPad上網，蘋果 Fans一定最受落。

■如果齋為咗部 iPhone 4格價，查實幾間無乜分別。

■ 3仔舊客送多一張 Micro SIM，梗係俾埋部 iPad用啦！

上台劏機？無着數！

當然，好多人上台其實另有目的，想要部機啫，上唔上網話之佢！以 3仔為例，選用最平$138月費計劃，想出部 16GB iPhone 4，其實無着數。因為簽約兩年嘅話，月費成本就係$3,312，加埋機價$3,380，總月費成本就達到$6,692，而去蘋果店買部 16GB都係$4,988，無 So！如果揀個貴 Plan仲離譜，以$398計劃為例，月費成本已高達$9,552，真係零機價都補唔番！

■ PCCW月費提供埋免費 Wi-Fi。

iPad月費唔綁約

低用量計劃已提供上限收費，咁就唔驚「爆 Plan」啦！

先達水貨就跌破萬喇！

T-Perfect Mobile阿康

iPhone 4淨機唔使$5,000，唔止你覺得震撼，甚至乎對先達 Sales嚟講，更係萬二分擔心！佢哋唔怕水貨走唔甩，至怕一旦行機供貨充足，水機就焗住要冧。 T-Perfect Mobile店員阿康話，自從幾日前收到 iPhone公佈定價， 16GB水貨已即時由萬四蚊勁插水至萬一，更慘係揸住成手「蟹貨」嘅舖頭，隨時每部蝕住賣，慘如割肉！佢仲話，以前得 3仔有機出，今次變成 5間，貨源又充足，水貨價穿一萬已可肯定，至於行貨會否炒升，就要視乎供應喇！

蘋果日報